هبة صوالحة

الحياة بالنسبة إلي هيه إحصاء لأكبر عدد من النشاطات يلي ممكن يخلوني مبسوطة، ومعرفة مين من هدول النشاطات يلي بتصيبني بحالة من الشغف اني أضل مستمرة فيهم لفترة طويلة، وأي من النشاطات يلي بكون مبسوطة فيهم بأولها بس لأني بزيح هالة الفضول عنهم.

كان واضح لإلي من زمان قديه بحب اللغات، بس ما كنت بتخيل أبداً قديه حلو إنك تدّرس لغتك لشخص آخر و تشوفو بستخدم المصطلح الي انت علمتو ياه في نقاش مع شخص آخر، ولا كنت بعرف قديه حلو تقعد مع مجموعة بتضم أكتر من أربعة جنسيات يحكو عن أفكارهم ومعتقداتهم و قديه غريب إنو مرات أفكارك بتكون أقرب لأفكار حدا بأمريكا من أفكار جارك!

قديه اشي فخم نكون قاعدين مع بعض وسامع تنتين بحكو بالإسباني و تنتين بحكو بالتركي تنتين بالفرنسي وانت بتحكي مع الي قدامك بالانجليزي ومنخوض نقاشات عميقة مرات و منضحك كتير مرات.

قديه رائع يكون عندك أصدقاء استثنائيين جداً بفرنسا و اسبانيا و إيطاليا وأمريكا و تشيلي.

وهيك دخلت عالمركز من الباب يلي كنت متأكدة منو "حب اللغات" و بعدين خلاني أكتشف حبي لكل الأشياء التانية، فعلاً مدينة للمركز و للمس لُهى عكل اللحظات الي قضيتها هناك و عالخبرات و الأفكار الي اكتسبتهم، وأهم شي عالصحبة و الأصدقاء من متطوعين محليين او دوليين.

وبعد تقريباً سنة من التطوع بالمركز، شغف تعلّم و تعليم اللغات لسا بيزيد، و الفضول حول اللغات و الثقافات بيتجدد مع كل متطوع جديد و أسلوب جديد و وعقل وجهات نظر جديدة.